Moi luu,
Nog ain moal mien blog in het Grunnegers omreden dat het nog aal Westerwolder Weke was in onze gemainte en doarbie is het vanzulm ook meertmoand streektoalmoand in de pevincie.
Meroakel schier dat wie ain moal in het joar onze streektoal zo onder joen aandacht brengen kennen. Dat mouten, wat mie aangaait, voaker doun, mor ja, wie hebben mor ain moal per joar de Westerwolder Weke…
En doarom gait mien blog veur een groot gedailte over de dieverdoatsie dei d’r dizze weke nog was.
Mor d’r gebeurde ook meer. Moandag had ik een vergoadern mit Jan Tingen, de old directeur van de GKB in Assen. Luu die zug bezig holden mit Nij Begun hebben hom vroagd of hai zien kennis broeken wil veur het onderdail ‘Armoede’ vanoet de Socioale Agenda van Nij Begun. Doar hebben ze krek de juuste man veur benoaderd. Jan het visie en laange stoat van dainst as het gait over aarmou en schulden.
Jan het met nog wat luu een methode bedocht dei de noam ‘doel-doen’ mitkregen het. Doarbie is de bedoulen dat luu dei het stoer hebben financieel weerboar te moaken. Dizze aanpak gait d’r om dat er praktische en ook hoalboare stappen moakt worden om oet de schulden te komen. Dat is hail aans as de methode woarbie er oetgebraide trajecten binnen dei joarenlaank duren. Ik kiek oet noar de stappen dei moakt worden.
Ie waiten misschain dat wie as gemainte het Cittaslow keurmaark hebben. Wie hebben veur dat keurmaark ook een baarg supporters en waarken soamen mit onze buurgemainte Borger-Odoorn. Aflopen weke troffen wie mekoar in het Spiekerhûs in Troapel. Meroakel schiere middag en binnen weer twee ondernemers supporter worden. De eerst was de Stichting Heksje Hasje oet Zelln en Leon Eikens van het Spiekerhus is zulf ook supporter worden. (baide foto’s heb ik zulm moakt)
Dunderdagoavend deden wie mit vaar wetholders mit aan de pubquiz bie de RSG in Troapel. Zoas altied hadden zug d’r baarg luu aanmeld. Mor man, man, het begun was hail stoer. Wie kregen letterlijk het gevuil dat dizze quiz veur ons gain smieten mit de mutse noa was! En dat was nou krek een spreekwoord dei onderdail van de quiz was. Mor goandeweg ging het al smuier en woar gain aine op rekend har… wie wonnen de eerste pries. Mor dat was een laange weg. Gedailde eerste ploatse mit de Ommelanders oet Zėlln. Dou mozzen wie aalmoal nog drei vroagen moaken. En weer geliekspul. Op ‘t leste mos een schattingvroage de deurslag geven. En het baaintjeder d’r om. Mit ain ciefer verschil gingen de wetholders d’r mit de pries vandeur en de wisselbokoal ging weer mit weerom noar het gemaintehoes. Mor wat was het een spannende oavend!
Aiglieks zollen wie vraidag al de leste dag hebben van de Westerwolder Weke… mor Henk Vieregge oet Vlagtwedde har bedocht dat het schier was as d’r in Vlagtwedde het Grunneger Volkslaid mit doezend man tegeliekertied zongen worden zol op zotterdag. En omreden dat het ain vet ofnemen was har hai dou ook mor bedocht dat het nuuver wezen zol as de haile middag d’r genog te doun was in Vlagtwedde. De grootste aierbaale wer bakt en doar mos Olaf Vos den vanzulm ook bie wezen. Dat ken ook ja nait aan, want as ie joen klassiekers kennen den waiten ie dat Olaf doar een hit mit moakt het.
Omdat Henk toch bezig was het hai ook votdoadelijk Burdy ook mor even boukt. Josien Bakker zong en Krzysztof Groen mog ook nait ontbreken. Het popkoor oet Blijham was d’r ook en d’r wer ook nog een ainakter speuld deur luu van ons aigen Open Luchttheoater oet Zelln.
Mor dou Burdy begon te zingen ging het dak d’r bienoa of. Burdy dut meer as allennig zingen. Hai is buschauffeur en ook nog roadslid in de gemainte Hogeland. En dou ’t in proat te pas kwam bleek dat wie baide van de lokoale partij binnen… Burdy van Gemaintebelangen Hogeland. Wie hebben noa ofloop nog even hail schier mit mekoar kwedeld as lokoalen onder mekoar…
Wie hebben aan ’t ėnne het Grunneger volkslaid zongen mit 1003 man staark. Henk en ik hebben secuur telt bie de deure en mie dunkt dat dit mooie oetkomst was. Henk het zien wereldrecord vestigd. Mit doezend man het Grunneger volkslaid zingen! As joe het mist hebben den ken je het op You Tube nog even bekieken. De haile middag is live oetzonden en Aike Godlieb van GenA media het ook weer slim zien best doan, net as HJ Sound oet Vlagtwedde. En elk en aine dei ik vergeten bin… stief bedankt. Luu hebben een haile schiere middag had!
Henk Vieregge is te beschaiden om te snaaren, dus dat dou ik even veur hom … kört mor krachtig…stief bedankt veur alles wast doe veur de Westerwolder Weke oan hest! Wie binnen d’r bliede mit!
De foto’s in dizze blog binnen bienoa aalmoal (behaalve de Cittaslow boudel) moakt deur André Dümmer, woarveur hail veul daank André!!!
Veur nou wens ik joe aalmoal hale schiere (waark)weke tou!
Groutnis,
Giny Luth
Wetholder