Moi luu,
Joe vuilen hom al aankomen… het is Westerwolder Weke in onze gemainte. Tot vleden joar nuimden wie dat de Grunneger Weke mor omreden dat wie slim aigenklouk worden binnen hebben wie dat omtoald noar Westerwolder Weke. En zo is d’r ook gain onduudelijkhaid.
Oflopen weke heb ik mie nait verveeld. Vergoaderns genog, mor in dizze blog zel ik joe doar nait mit ploagen . Aiglieks is het meer een ploatjesverhoal, want ik goa joe dammit bestoken mit een baarg foto’s van de leste twei doage. Foto’s zeggen meer as doezend woorden… Om te begunnen; veul foto’s binnen moakt deur André Dümmer, mor zitten ook stuk of wat maank dei ik zelf moakt hebt of ain van ons ambtenoaren dei d’r bie wazzen. Benoam Ankie en Florien hebben het zo drok had as hounder veur poaske.
Wie binnen vraidag begunt mit de priesoetlangen van de Westerwolder Schriefwedstried. Aal joar zuiken wie een aander stee om dat te doun. Dit moal hebben wie kozen veur Jipsenhoezen woar wie in het buurthoes te gast wazzen.
Aal luu dei mitdoan hadden aan de schriefwedstried wazzen nuigd en de maisten binnen ook komen. Ons aigen Josien Bakker, dei as nog jong wichtje bie ons de eerste stappen zet het in heur affeer as zangeres zong haile nuuvere laidjes en ook het Ketelkoor oet Zèlng zong veur ons. Eize, dirigent van het Ketelkoor, het verschaiden verskes omtoald noar het Grunnegers en zulfs ‘Du’ van Peter Maffay mos d’r aan geleuven. Zien troanentrekker en het wichtje woar hai over zong hait nou Westerwol.
Meroakel dat wie dizze weke de Grunneger toal bie zoveul luu nog even onder de aandacht brengen meugen. En joa, ons Grunnegers is een toal omreden dat dit een onderdail oetmaokt van de Nedersaksische taol. Het Nedersaksisch is erkend as toal… dus huif je gain hikhakkerij meer hebben over de vroage is het dialect of toal.
Noa de koffie mit kouke wör elk en aine toch wel wat hister en was het de hoogste tied om te begunnen mit het bekind moaken van de winnoars.
Wie hadden nuuver wat inzendens. Nou mout ik joe eerlieks zeggen dat wie sunds poar joar besloten hebben dat elk en aine dei Goud Geef Grunnegers schrieven ken mitdoun mag in Westerwol. Dat hebben wie doan omreden dat wie leste joaren nait slim veul inzendens oet ons aigen gemainte kregen. Wie vuilen het in WEsterwol as moutwaark om de toal in ere te holden en as wie dat doun kennen deur het blievend onder de aandacht te holden den mouten we dat doun. Dat paast ook hail goud bie ons Cittaslow keurmaark en de overtuugen dat het Grunnegers bewoard blieven mout. Dus elk en aine dei Grunnegers schrieven ken mag mitdoun. Paast ons hail goud dat doar biekomt dat elk en aine onze gemainte den ook vanzul kennen leerd en dat is den ja ain vet ofnemen.
De winnoars van dizze schirefwedstried wazzen:
Winnoars verhoalen:
1e pries: Harry Lutjeboer met ‘Planeet Boelie’
2e pries: Harma de Roo mit ‘In toeze’
3e priess: Trijnko Pelgrim mit ‘Een lasteg pakket’
(Begroot ons dat Trijnko d’r nait bie wezen kon omdat hai zaik was.)
Winnoars gedichten:
1e prijs: Hilly Keitz mit ‘Het Wonder’
2e prijs: Marja Bos mitt ‘Laange wòrrels in Westerwòl’
3e prijs: Dolf Houwing mit ‘Zo bemind’
Felicitoaties binnen vanzulm veur aale schrievers! Begroot ons dat Trijnko d’r nait bie wezen kon omdat hai zaik was.
Zotterdag op tied weer noar Zèlng woar wie in het gemaintehoes de officiële opening hadden van de Westerwolder Weke. Dat hadden wie nait op vraidag omreden dat de priesoetlangen allennig veur luu is dei mitdoan hebben aan de schriefwedstried. Aans kennen wie aal dei luu nait baargen.
De opening zotterdag was een Westerwolder maark mor wel mit hail veul diverdoatsie! Wat hebben ze d’r een waark van had mor wat was het de muite weerd! Aal dei kroampkes woar de Cittaslow ondernemers heur koopwoar oetspreid hadden muik ons slim bliede. Wie hebben eerst luusterd noar Jeduthun dei vanzulm ons volkslaid speulden en ook Josien weer bie ons!
Ik ken mien verhoal dammit nait ofsloeten zunder te benuimen dat mien collega wetholder Van der Goot ook votdoadelijk ‘joa’ zee dat wie hom vruigen om ook met zien negoatsie dail te nemen aan de Cittaslow maark. Mor wat ken hai mooi schilderen en benoam leutje sleudelhangers woar hai joen hoesdaier op schildert wazzen slim in trek. Stief bedankt Henk veur dien inzet!
Onderwiel mog ik ook nog koken mit Niek. Mor eerlieks woar… Niek het het waark doan en ik ging mit de eer strieken en aan t enne het Henk van der Goot het opeten en vond hai het slim lekker. Ik heb wel leerd (en oetvoerd) dat je, as je vegetarisch eten willen, roggebrood van bakker Leta oet Veele, meroakel van pas komt as joe dat krummelen en den opbakken. Den ken je het gehakt achterwege loaten.
Hanne Wilzing was d’r ook en wie pruiten over het Westerwolds volkslaid en wazzen mit mekoar ains dat het aiweg zunde is dat dit laid nait sikkom gain aine meer ken. Hoeswaark te doun dus… Wel het hai mie nog leerd wat ‘nosk’ betaikend. Ik kon het woord nait.. joe wel? Ook volgende weke schrief ik mien blog in ons Grunneger toal en as ik d’r om denk den zel ik joe vertellen wat ’t betaikend.
Anita Berends kwam nog een laid zingen en de kinder van Op d’Esch hadden hail laank reptaaierd om doar een dansje bie te doun. Hail mooi dat kinder op zo’n menaaier ook bie de Grunneger toal betrokken worden. Anita komt ook oet Westerwol en waarkt ook nog bie onze gemainte. En dat paast ons ja krek! As joe heur nog nait kennen den mout je mor even op https://www.youtube.com/watch?v=V87nlZDBPu4 kieken!
Wie hadden bedocht dat het schier wezen zol as wie veur luu dei kwamen ook een soort van zaipkiste hadden woar elk zien of heur veurdracht doun kon. Dat hebben wie waiten! Dat vuil slim in de smoak en wie konden ons verheugen in aal dei verhaolen en gedichten dei veurbie kwamen. Mor as ain van ons inwoners de muite nemt om mit taxi noar het gemaintehoes te komen om oet de kop ain noar de aander riemsel veur te droagen en as ze den ook nog 98 joar jong is…. Den ken ik nait aans as heur ook nuimen! Wat wazzen wie bliede mit joen komst vrouw Mettina Bruining-Principaal!
Luu hebben slim van joen veurdracht gnotterd! Nait allennig van joen veurdracht…mor ook gewoon zoas joe binnen. Dou ik vruig wel of mit joe mitkomen was kreeg ik as antwoord:”Gain aine, dat von ik nait neudig!” Ik hoop dat ik over dattig joar ook nog zo noar t gemaintehoes goan mag! Het is een veurrecht as je zo old worden meugen, mor wat een riekdom as je den ook zo nog over joen foekepot dichten meugen. Dat muik ook dizze dag weer een dag mit een golden raand!
Hail veul dank aan elk en aine dei dizze dag een golden raand gaf! Aal dei Cittaslow supporters dei d’r wazzen, onze bodes dei geern heur staintje biedroagen wollen, onze dorpsschraauwer Wietze dei ook nog even kwam en elk en aine dei op de spreekwoordelijke zaipkiste klom.
Kieken joe nog even op ons webstee wat d’r komende weke nog meer te doun is?
Veur nou wens ik joe aalmoal een haile gooie weke tou!
Groutnis,
Giny Luth
Wetholder